婦女事務委員會趁住尋日係三八婦女節搞咗個午餐講座，唔單止邀請到恒生銀行女大班梁高美懿同長實企業公司秘書楊逸芝等商界女強人出席分享，仲請埋行政會議召集人CY梁振英同港大首席副校長王于漸兩個大男人，出嚟講吓佢哋喺呢個女性話事嘅年代點生存。
午餐會嘅論題係「婦女參與是經濟發展的關鍵」，CY甫出場就話呢個題目唔使點傾，事關佢喺屋企對呢句說話體會好深喎。佢解釋話同太太係共用一個信用卡戶口，每個月當佢收到張咁乸脷嘅月結單，正準備投訴時，佢太太就會爆出一句「婦女參與係經濟發展嘅關鍵」，令一直注重本港經濟發展嘅佢想駁嘴都唔得。
CY又話自己同好多男士一樣都係「二五仔」，成日都禮拜二飛去國外做嘢，禮拜五先飛返嚟香港陪家人，好彩得到太太照顧家庭，仲話如果冇咗一班偉大嘅婦女，好多「二五仔」都生存唔到喎。
王于漸亦認為依家女性地位絕對不容忽視，而後年開始，香港就會推行三三四學制，佢預計有愈嚟愈多女仔入大學，會叮囑學校總務處起定多啲女性化妝間，如果唔係就會畀人批評港大就三三四學制準備得唔足喎。