張校長尋日矢口否認有參選之意，表示對傳聞莫名奇妙，仲話從來冇意思、亦冇考慮參選，更加冇人游說佢參選。佢話自己愛好自由，加上校長工作又忙，做立法會議員唔係佢杯茶喎！咁即係拒絕飲呢杯茶啦！

認同補選似鬧劇

佢相信傳聞源自言語誤會，事緣上禮拜佢同一位反對公投嘅立法會議員傾偈，雙方各自講吓對補選嘅睇法，但完全冇提及參選一事，點知前日佢離奇收到傳媒電話，問佢係咪想參選。佢話：「我當時好愕然，唔知點反應，淨係諗究竟邊個傳出嚟？」覺得畀人擺上枱。咁邊個擺佢上枱先？佢點都唔肯講，總之就唔係校友兼富貴黨副主席張宇人喎！

好多人都覺得呢次補選似鬧劇，張校長都有同感：「你自己辭職唔做，但又自己出番嚟選，咁係咪搞笑呢？」好似佢一個朋友，都係中學校長，已向學校辭職，點知過一排又後悔，寫番信去應徵同一職位，最終未能如願，張校長有感而發咁話：「我之前都有勸佢唔好㗎，好似玩咁！」