EQ尋日憶述話，首次潛落零下兩度嘅冰水，嘴唇、手指同大腦凍到麻痹，佢仲做埋深海冰潛攝影師，托住大機下潛，點知畀強大水流扯到人仰馬翻，好彩喺冰天雪地下曬太陽嘅企鵝、海獅乖巧好多，全程佢影咗八千幾張相，遲啲仲會出書。

此行有五十七人，當中只有三個係香港人，除咗EQ兩公婆外，仲有「魔童」之稱嘅城市電訊主席王維基。魔童臨行前寫定遺囑，EQ就懶得寫，但當知道智利發生大地震後，貴一貴都用衞星電話向家人報平安。

點知話口未完，地震激起嘅風浪連南極都感應到，海面捲起十五米巨浪，隊員置身船艙如坐過山車，結果有人跣低扭親腳、仆崩下巴，亦有人夾斷手指，EQ天生異稟，冇暈浪亦冇嘔，但折騰咗二十五日，都瘦咗六磅。