林煥光尋日喺大氣電波談及男女平等，亦提及成為社會熱話嘅「80後」年輕人，「50後」嘅佢話「80後」呢個詞語好似將一班年輕人標籤化咁，但其實火紅並唔係「80後」嘅專利，佢自己喺大學時代都非常「火紅」。

林煥光憶述當年情況，話自己七十年代曾經跟朋友參與保釣運動、中文運動，如果講激進，「80後」根本遠遠不及六、七十年代嘅抗議人士，「好似以前油麻地艇戶抗爭等，你同番啲老餅講吓，不知幾激！」

不過，佢都話應該以正面同積極嘅角度，去睇依家年輕人表達意見嘅行為，仲話「80後」比佢哋以前嗰代更加有創意。