佢呃到自己，但呃唔到班立法會議員同市民嘅，事關班議員向政府提出有關預算案嘅問題數目又創新高，近三千二百條，呢次真係炸爆財經事務及庫務局局長「傻強」陳家強囉，人如其名做到佢傻。

點解咁講？為咗審議新一份財政預算案，立法會財務委員會安排咗喺今個月二十二至二十六號，舉行合共超過二十七粒鐘嘅特別會議，而議員喺今個月初期限之前，已經透過立法會秘書處向政府提交有關預算案嘅書面問題，等財經事務及庫務局分派畀相關政策局或部門回答。

立法會秘書處尋日終於數完收到幾多條書面問題，發現今年首次突破三千大關，總共有三千一百九十二條，比舊年多大約二百條、比前年更加多約四百六十條。大家唔好忘記，依家議事廳經已少咗五名議員，所以按人均計算，平均每名議員提出問題嘅數量肯定係歷年之冠。屈指一算，剔除立法會主席，平均每位議員提出大約五十九條書面問題！

分流工作吃不消

若果話鬍鬚曾做嘅預算案係正嘢嘅話，咁點解佢喺○七年上任財爺之後，議員就預算案提出書面問題嘅數量會每年遞增？數字說出真相，就係因為佢做嘅預算案愈嚟愈不濟。試問預算案令市民滿意嘅話，社會仲邊度會有咁多意見？議員又何來有咁多問題要質詢政府呢？

今次鬍鬚曾宣布一份Hea爆嘅預算案，搞到議員瘋狂提出書面問題，但煩唔到佢，難為傻強個局白狗當災。雖則唔會條條書面問題都由佢個局去回答，但淨係做分流工作已經令人吃不消啦，睇嚟傻強呢次真係多得鬍鬚曾唔少嘞！