*記者提問
▲何柱國回應
佢畀機會我買《星島》
*點解今次會聲援蔡生?
▲覺得有啲同病相憐。今朝早我打電話畀蔡生,我同蔡生話呢,叫佢唔好勞氣,唔好激氣,我話我以前亦都經過同樣嘅經歷,我就咁樣同佢講啫。嗱,我要各位知道,我講一樣嘢,我同查懋聲係朋友嚟o架,我唔係攻擊佢o架,因為我要好多謝佢,佢畀呢個機會等我去買《星島》,咁我先可以做得出有啲成就出嚟,今日《星島》都起碼算成功吖,所以我唔係攻擊佢o架,不過我覺得蔡生嬲都有佢理由,咁我就解釋畀佢聽「你唔好嬲」,唔係佢哋以為我哋香港人呃台灣人吖嘛,咁我係香港人都有咁嘅經歷,所以唔需要嬲,而且係一件好事嚟嘅,點解呢?如果無查生,我都無得做一件有意義嘅事吖,因為起碼我哋《星島》員工個個都幾好吖,所以我係感謝佢o架,衷心感謝。
*何生,你話以前有類似經歷,係咩經歷?
▲嗰啲經歷呀,好耐咯,十年咯,都十年o架喇,但我唔係報仇呀,啲人話君子報仇十年不晚,我絕對唔係君子嚟o架,我小人嚟o架,我唔係君子,我唔係報仇。
*可唔可以同蔡生分享番點樣經歷投資或有咩問題?
▲查生呀,牽涉《星島》少少啦,佢一陣又話做,一陣間又話唔做咁嘅嘢啫,小事嚟o架,我好感謝佢o架。
我同佢千祈唔好合作
*可唔可以問番清楚少少,因為蔡生話你同佢講話吃過虧,咁吃虧係咪同查生有關?係咪同《星島》買賣有關?
▲係,嗰時有少少關係啦,十年前嘅嘢我都唔記得咯,呢啲嘢有時谷氣過頭唔記得,就唔會時時記得o架喇,但係都係好事,絕對係好事o架,所以我好感謝查生。
*吃虧純粹係……
▲吃虧就無吃虧,講唔講誠信啫,不過呢,睇番嚟查生嗰時後生,後生仔講唔講誠信信用都唔緊要,查生今年幾多歲?幾多歲呀?(六十二歲)六十幾呀,十年前都唔算後生o架喇,都係成熟嘅人,不過,佢嗰時好後生,因為heart,唔緊要o架。
*可唔可以組織吓你十年前嘅片段,係咪查生都曾經表示過同你合作《星島》嘅發展,但係話投資……
▲喂,唔好呀,嗱,如果我同佢合作呢,更慘o架喇,咁變咗蔡生,淪落到今日蔡生嘅地步,好在無合作,唔係談合作嘅,千祈唔好合作。
蔡生誠信可靠啲o架
*最後佢係無參與到?
▲無無無,查生係一個好人嚟,你記住。
*點解一個好人會咁無信用呢?
▲信用?後生仔唔緊要嘅,後生仔,喂你十零歲,六、七歲嗰時,同朋友仔講吓唔認數都得o架,無乜所謂。
*佢嗰時五十幾歲……
▲五十幾歲,佢心裏面時時認為自己後生嘛。
*何生,你當年同佢傾生意,依家大家都係朋友?
▲梗係朋友嚟啦,我好支持佢o架。
*係咪話畀蔡生聽佢無需介懷繼續去搞亞視?
▲我叫蔡生呢,嗱,蔡生係一個白手興家嘅人,一個白手興家嘅人一定有佢成功嘅地方,一定係一個有信用嘅人先可以做到咁大嘅生意,唔係容易o架,一步步爬上嚟嘅,查生同我背景差唔多,都唔係創業o架嘛,蔡生嘅水平呀成功呀,更係高我哋好多。
*蔡生同查生係繼續合作,你覺得應該繼續定係點?
▲你問我如果兩個人,嗱,佢哋內容我又唔係好清楚啦,蔡生誠信可靠啲o架,因為佢成功啲嘛。
自嘲唔識講嘢又天真
*何生,如果有人話要同查生合作,你有冇咩忠告畀佢,例如王征?
▲王征講嘢咁叻,佢都好識講,嗱,我個人就唔識講嘢,我無查懋聲講嘢咁叻,水平咁高,我就直腸直肚啲,佢講嘢好有深度o架。
*咁佢點樣搵你笨?
▲佢無搵過我笨。
*跣你一鑊喎?
▲唔可以話跣我一鑊,我天真啲啫,我天真我傻啲啫。
*點樣袋錢落你袋呀?點益咗你?上咗人生寶貴一課?
▲喂,睇人識人嘅嘢,用吓大腦囉,唔好信嗰個人屋企有咩背景,乜乜嘢囉,用吓大腦囉。
*蔡生話查生欺人太甚,你覺得係咪有啲感同身受?
▲欺人太甚就唔會囉,點欺人太甚吖,慣咗o架啦,人生路不熟係咁o架啦,都唔係欺人呀,啱唔啱呀,蔡生就信佢多啲囉,蔡生就直腸直肚嘅。
*以你所知除咗你兩個之外,有冇其他人都有同樣嘅遭遇?即係有冇人畀佢坤過囉?
▲唔好講坤字,呢啲唔可以立亂講,坤人呢啲嘢唔可以咁講。
有冇人憎恨到要開槍
*即係同樣遭遇嘅人大家都可以將一啲經驗分享多啲?
▲分享好難講喎,有啲人講咗我又唔方便講人哋嘅嘢,嗱,佢十幾年前被人開咗槍,呢個世界上面好少有o架喎,為咗咁嘅嘢開槍打人嘅事件,佢被人打一槍嘅事好少有喎,有冇人會憎恨到要開一槍呢?
*開槍……係咪查懋聲?
▲我就唔清楚呢件事,點解有人會上佢寫字樓,你哋唔知呢件事o架?你哋全部後生去睇吓啦,上到寫字樓被人開一槍呀,嘭一槍,為咗啲判頭唔知咩事,返去查吓網頁啦,做記者要睇吓前因後果嘅。
*你會唔會擔心佢都畀人嘭一槍呀?
▲唔好嘅,唔會嘅,咁好嘅人點會畀人嘭一槍呢?
*佢點好啫?你成日話佢好人,又講唔出佢有幾好喎?
▲佢對我好喎,令我做咗一番事業出嚟,有咩唔好呀?點呀,我call你個個都嚟吖,即係證明我都成功吖。
強調唔係攻擊佢o架
*其實你以前同查生交手,你會點形容當時你同佢交手嗰一役呢?
▲無乜點樣交手,我聽咗之後無聲出之嘛。
*但你係咪忍咗十年?
▲我無忍到喎。
*即係等到依家有機會講?
▲咁嗰時我接收咗《星島》,咪化悲憤為力量,依家咪幾好,我係咪要多謝佢呢?我真係多謝佢o架,衷心多謝佢,我唔係攻擊佢o架,你要記住,我係多謝佢呀。
*之前有冇同佢交過手,《星島》之前?
▲哎吔,十隻手指都喺度,好在。(數得晒呀?)數得晒,仲多咗啲添,無無無,謝天謝地。
*何生,有冇幾字真言忠告蔡生以後點走條路?
▲化悲憤為力量囉,我覺得愈做愈好o架蔡生呢次。
據了解,九十年代,當時經營星島的胡仙曾向何柱國的祖父、人稱「何伯」的慈善家何英傑借錢,及後胡仙有意放售星島而查家表示有興趣,何伯作為最大債權人,遂派何柱國作代表與查家商討,但在簽約前二、三小時,查家突打退堂鼓。據悉,何柱國為此更遭到何伯教訓,在商場上勿輕易信人。