環境局局長邱騰華尋日出嚟解畫，話該基金係用嚟吸引外國生產商同科研機構嚟香港落腳，同本地運輸機構合作，提供電動車等更環保嘅交通工具喎。

之但係，邱騰華模棱兩可，講啲唔講啲，話就話叫人嚟香港落腳，但到底係嚟開廠生產電動車呀，定係嚟港搞科研呢？睇嚟，一頭霧水嘅唔止市民，高官一樣矇查查，唔知自己講緊乜，做緊乜。

冇錯，發展電動車確係大勢所趨，問題係，香港何德何能呀？大家都知道，香港製造業早就名存實亡，何況香港地少人多，開車廠最緊要係地方闊落，以美國股神巴菲特睇中嘅內地車廠比亞迪為例，生產基地總面積接近一千萬平方米，相當於三個觀塘，香港連迪士尼都起到全球最細，點樣生產電動車呀？

至於搞研究咯喎，無非又係一煲無米粥。你知我知，港府嘅科研支援嚴重不足，搞到科研人才紛紛遠走他鄉，遠嘅唔講，台灣嘅科研投放比率就比香港多出兩倍，新加坡嘅科研研究生人數比香港多四倍。香港人又無，錢又無，地又無，點樣吸引外國機構嚟港搞科研呢？唔通淨係靠嗰三億元撥款？唔好玩啦。

其實，香港唔係冇科研人才，亦唔係冇科研成果，呢，理工大學就研發出一款效能不俗嘅電動車My Car，據講技術處於世界前列添。舊年丹麥哥本哈根舉行氣候峰會，My Car穿梭會場，負責接送參加會議嘅各國嘉賓，出盡風頭，為香港人增光唔少。

咦，既然香港都有自己研發嘅電動車，性能又唔差，口碑又幾好，點解港府唔諗吓計，將本地薑發揚光大，大量生產，反而捨近求遠，去搵外國生產商同科研機構嚟港落腳？唔通外國月亮真係特別圓？

如果外國月亮真係特別圓，咁都無所謂，問題係人哋肯唔肯嚟港落腳呢？講到尾，無論外國月亮又好，本地月亮又好，對於香港人嚟講都係鏡花水月，睇得到摸唔到。近年港府提出一大堆環保口號，牛皮愈吹愈大，但到底有邊樣搞得成？唉，高官一味吹水，咁同水中撈月又有乜嘢分別呀，叮！