07/03/2010

播放本新聞相關短片

政情:三副局爭認深水埗老街坊

本港貧富懸殊問題嚴重。全港最貧窮嘅地區中,深水埗多年上榜,不過,呢個窮區原來係高官搖籃,尋日保安局副局長黎棟國、財經事務及庫務局副局長梁鳳儀、運輸及房屋局副局長邱誠武、政制及內地事務局副局長黃靜文齊齊落去深水埗出席民建聯嘅活動,黎棟國、梁鳳儀同邱誠武透露佢哋細個都喺深水埗住過,對呢區零舍有感覺。

梁鳳儀自爆喺深水埗出世、長沙灣長大,小學同中學都喺九龍塘讀書,每日行路返學,總會途經石硤尾,成個深水埗區都充滿佢童年回憶,今次有機會返嚟睇吓啲老街坊,雖然唔係個個認識,但好開心!黎棟國就話自己都係深水埗「原居民」,喺南昌街住咗起碼十年,最深印象係已經拆咗嘅有男茶樓同到依家仍然屹立不倒嘅南昌大押,不過梁鳳儀同邱誠武對此無乜印象,咁係咪證明黎棟國同佢哋係兩個年代嘅人﹖

黃靜文就話呢排好唔得閒,先要處理大量團體嘅政改意見,又要頭痛搵人接任個人資料私隱專員;佢話唔一定要搵公務員,當然亦唔排除搵高官出任,但人選一定要有豐富行政經驗,最好有法律背景,咩出身唔重要。