07/03/2010

播放本新聞相關短片

政情:搞搞政:張震遠唔玩浪漫情懷

近年本港興起保育潮,港片《歲月神偷》載譽歸來,影片製作人大講取景地上環永利街嘅特色,要求保留呢個喺○三年已被市區重建局納入重建嘅地方,政府同市建局到家吓都唔肯表態。

尋日市建局主席張震遠喺一個電台節目中撰文,原本係講馬頭圍道重建項目,點知講講吓解釋起市建局嘅重建理念。張震遠話,我哋唔可以因為個人浪漫情懷,就犧牲需要援手嘅弱勢社群,呢句「個人浪漫情懷」指乜嘢?佢冇作解釋,但《歲月神偷》上映後掀起嘅「老香港」浪漫情懷恐怕會對佢帶來好多壓力。

近排支持保育永利街嘅動作已經一浪接一浪,繼做過市建局成員嘅海洋公園主席盛智文開腔要求保留後,都有地區團體發動簽名行動,網上更不乏力撐保留「老香港」嘅言論,各方面嘅大合唱令政府同市建局面對好大壓力,或者係咁,張震遠先不點名咁講吓浪漫情懷同重建嘅關係啫。

佢仲呼籲,港人要重視本港樓宇老化同舊區居民居住環境惡劣嘅兩大現實,佢用現實來抗衡「個人浪慢情懷」,柔性勸喻嘅味道好重。

不過,本港過去都有好多成功嘅重建項目,一方面可以保留港人嘅集體回憶,另一方面又滿足到人們嘅浪慢情懷,市建局如果可以兩邊平衡都未嘗唔好噃!