北京兩會開幕以來，尋日係首個周末，部分早幾日上咗北京開會嘅城中名人原來靜靜雞返咗香港，我哋尋日喺馬場就見到全國政協委員方黃吉雯（小吉），原來佢嘅乖女方善政（Bonnie）名下嘅「科研精英」尋日出賽，仲順利跑出頭馬，獎金高達三十五萬六千幾蚊，小吉睇完愛駒出賽後，即晚就坐飛機返北京，啲獎金夠佢坐頭等艙有凸啦。
Bonnie話因為佢喺牛津讀科學，所以幫隻馬改名叫「科研精英」，唔知係咪因為咁樣，Bonnie都唔信邪，鍾情於黑色嘅佢尋日以一身行政人員黑Look入場，連佢有份設計嘅騎師綵衣，主色都係黑色。佢匹馬之前出過三次賽，兩次攞第三，今次贏咗，但「科研精英」就好有性格，頒獎嗰陣點都唔肯畀人拉住影相，搞到冇得為「第一次」留念添。
小吉尋日話，聽講北京過兩日氣溫得番攝氏一度，佢今次上去，都會順便執多件大褸，至於護膚品呢啲女士恩物，佢就話唔使點帶。