亞視兩大股東查懋聲同台灣商人蔡衍明嘅爭拗升級，除咗鬧上法庭外，連日兩大商人隔空過招更成焦點。曾經做過亞視老闆嘅遠東集團創辦人邱德根尋日就開腔評論事件，佢話查懋聲係好人，至於點解決兩個股東嘅官司，佢就話唔評論嘞！
邱德根尋日現身馬場，唔知係咪對亞視負面新聞感到心噏，一開始時，佢都唔係太想回應，最後忍唔住先講幾句，佢讚查懋聲係好人，仲相信亞視有得做，最重要係搵多啲人才。佢仲爆料，話同查懋聲已故爸爸查濟民係多年好朋友，佢哋兩老都係先喺上海發迹，再落香港發展，大家惺惺相惜，當年仲一齊成立仁濟醫院，堪稱為世家；在情在理，邱德根撐查懋聲都係無可厚非。