周末嘅馬場係好多人輕鬆嘅地方，呢個月中會喺台灣小巨蛋開演唱會嘅溫拿五虎，尋日都抽空入馬場輕鬆吓，阿倫譚詠麟話，尋日有好多老友都有馬出，所以佢哋一齊嚟支持吓。呢五虎合作廿幾年，連放假抖一抖都一齊，真係服咗佢哋。
五虎雖然行動一致，但入馬場就各有裝備，年初又做老竇嘅阿B鍾鎮濤全程孭實部相機，睇真啲，原來係Panasonic Lumix DMC-GF1。
阿B話，其實佢最愛係另一部機，但GF1有閃燈，夠晒方便，依家用佢嚟幫仔女影靚相，連大機都唔使用。
呢部機早前曾被「電器大王」蒙民偉公子蒙德揚封為「女朋友一號」，早幾個月樂聲盃賽事，蒙德揚都孭過呢部機，原來佢同阿B審美觀好一致噃。
