07/03/2010

播放本新聞相關短片

政情:德成局長發老脾當眾出醜

為官之道,能言善辯同言行得體好重要,尋日青年高峰會鬧出署理特首唐英年差啲畀鞋掟中嘅鬧劇,負責活動嘅人都覺得好錯愕,但反應就高下立見。民政事務局局長曾德成尋日都喺現場,散會後,佢被追問係咪安排失當、台上發問嘅青年係咪欽點時,佢突然發老脾話:「我做新聞嗰陣時你哋都未出世呀!」

佢呢句一出,在場人士都聞到火藥味,知道德成局長發老脾,但記者一於好少理,好客氣咁再重複多次問題,德成局長見去路被人截住,惟有回應:「你哋頭先聽到嘛?你哋頭先聽到台上點講法嘛?」佢用會方嘅解釋做擋箭牌,但答咗等於無答。

德成局長未入政府前,喺傳媒界做咗三十年,計正有晒資格喺後輩記者面前老氣橫秋一番,但係家吓你貴為問責局長,政府高層差啲被襲嘅事件都應該解釋吓啩。何況記者唔追新聞,都好難向公司嘅老總交代啦!

睇番德成局長嘅惹火嘢真係唔少,○七年落十八區區議會時,已窒番區議員話:「雖然我唔知出年見唔見到你……」好似暗示人哋選唔到咁。更曾經以「忽然民主之外,仲會有忽然民生」,寸到民主阿婆陳方安生無還擊之力,真係句句有力,可惜EQ(情緒智商)似乎唔啱要襟激嘅官場噃!