林公公同Rita首日訪問時大玩隔離，尋日就去咗南投縣考察當地旅遊服務同配套設施，包括乘搭日月潭纜車，事後少不免被人問到港台兩地纜車嘅比較，Rita話，兩地纜車都好安靜，都有小窗口畀乘客觀景同涼風拂面，但比較起來，台灣日月潭嘅纜車景色較綠。

Rita倒米變相踩昂坪

作客異鄉係應該客氣，但Rita呢句話大有暗踩香港昂坪景觀之意，唔好忘記，好多遊客搭香港纜車都對懸空嘅海景好陶醉，Rita不經意貶香港，即係倒本港旅遊業嘅米啫。

林公公又點答呢？佢話兩地風景各有優點，日月潭纜車只係開辦咗幾個月，非常新，而香港新同舊嘅纜車都有一定水平，台灣嘅朋友都非常喜愛。林公公兩邊讚晒，只係佢嘅答案又係石頭鑽唔出血啫。

講完搭纜車後，Rita都講到訪台中兩日嘅感受，佢話，參觀燈會時見到台灣民眾家庭歡愉嘅面孔，留低咗好深刻嘅印象，仲話一個城市嘅領導透過自己嘅性格、家庭同價值對城市帶嚟影響。

呢篇讚美之詞令人印象深刻，亦凸顯Rita老實嘅一面，不過，兩個問責局長去台灣訪問以來，畀人嘅感覺都係小心翼翼，如果當地傳媒透過佢哋睇香港，可能以為港府官員對台嘅態度都係噤若寒蟬、唔敢行多一步，同胡志強訪港時嘅瀟灑真係差天共地，港官似乎仲需要多啲磨練。