德成局長發噏風順便驗埋

近排成日有司機濫藥，有啲索到成口都係粉，架車行到舞龍咁舞，真係離晒大譜，聽講繼校園驗毒計劃之後，相信好快就輪到司機驗毒。咁又係嘅，學生哥喺學校開大餐索K，最多都係碌落樓梯仆崩鼻啫，冇乜點聽聞過有人狂性大發，拎起張櫈「車」同學仔。但係職業司機就唔同，佢哋揸住架係大殺傷力武器嚟㗎，喺馬路橫衝直撞，可大可小㗎，所以如果當局要搞司機驗毒計劃，本欄舉腳支持。

不過淨係叫搵食車司機大佬驗毒，咁樣算唔算係職業歧視呢？你睇吓嗰位德成局長吖，講嘢甩甩漏漏，被記者問多兩問，竟然當眾發脾氣話佢跑新聞嗰時，記者仔都未出世，咁都講得出口，一係就Short上腦，一係就係索咗K，所以我提議，以後煲呔曾同埋司局長真係驗清驗楚至好出嚟講嘢。

校園驗毒嘥氣有辦你睇

大埔校園驗毒試行計劃虎頭蛇尾，當局話唔打算擴展去其他區嘅學校，點知家陣又話打算搞司機驗毒，唔知又會唔會好似校園驗毒計劃咁，又畀人話侵犯私隱，又要求係自願性質呢可？

家陣毒禍唔講得笑，連小學生都吸毒，梗係要盡早將驗毒範圍盡快擴大啦。遲吓司機又話要驗毒，當局真係要吸取之前校園驗毒嘅經驗啦。講開呢個驗毒計劃，真係得啖笑。搞咗一大輪，竟然一個陽性反應都驗唔出，連禁毒專員都大潑冷水，話判別唔到吸毒學生兼夾冇阻嚇力喎……

所以話，如果今次要驗，第一當然係要強制性，費事班友話屙唔出，諸多藉口。第二就係唔好咁笨用尿嚟驗啦！其實，本地大學已經研發出又平又快的頭髮驗毒技術，唔單止即刻攞到樣本，當局今次又可以補番個鑊，支持吓本地科研事業，何樂而不為呢？

網友觀點……

甩毛豬：人命點都緊要過私隱吖，應強制驗毒！

四眼龍：政府冇乜宣傳勿毒後駕駛，唔通又要等到死咗人先做嘢？

的士佬：最好連乘客都驗埋，啲迷幻乘客隨時騷擾到司機㗎！

Tony：我覺得警察出更前，要吹吓波仔就真。