事關「光纖之父」高錕獲得諾貝爾物理學獎後，香港政壇掀起一陣抽水熱潮，當中抽得最勁嘅，就係曾蔭權。佢唔放過任何叨光機會，先係出席中文大學嘅高錕成就展，跟住喺禮賓府接見「少年發明家」得獎學生，尋日又出席香港科學園高錕會議中心命名儀式。總之逢係有關高錕嘅活動，佢都盡量出席，借讚高錕，大吹香港政府對科研嘅重視，硬銷所謂發展創新科技產業大計。

係嘅，高錕嘅成就確係冇得頂，徹底改變現代通訊科技，令資訊喺瞬息間傳播千里，佢獲諾貝爾獎係實至名歸。之但係，呢啲都係高錕自己努力嘅結果，不容他人抽水。請問煲呔曾，高錕嘅成就有邊忽係靠港府支持取得㗎？港府出過乜嘢力？

煲呔曾面皮厚，不嬲出晒名，勢估唔到，佢連舉世聞名嘅科研成果都夠膽叨光，真係要寫個服字。

煲呔曾等人將發展創新科技產業大計，講到天上有地下無，唔識嘅畀佢嚇死，識嘅就畀佢笑死。嗱，香港大學校長徐立之就狠批港府對科技資助不足。科技大學前校長朱經武亦話，香港唔係冇發展科研嘅潛力，亦唔係冇從事科研嘅人才，但係港府目光短淺，唔肯大力資助科研，又唔將科研成果發展成產業，結果得個講字。

講得冇錯，港府急功近利，令本地科研成果造成巨大浪費。不妨舉個例子，早前哥本哈根舉行全球氣候峰會，各國代表穿梭會場同住地，都坐一種叫做My Car嘅電動車，又快又穩，不知幾舒服。呢種車原來係香港理工大學研發嘅，但喺香港，政府寧願用日本貨，咁咪叫做場內開花場外香囉！

仲有噃，本港近排推動校園驗毒，要學生去洗手間攞小便樣本，搞到學生同家長呱呱叫，其實根本唔使咁麻煩，因為本港有大學研發出又平又快嘅頭髮驗毒技術。可惜政府睇唔上眼，寧願斥巨資買外國儀器。外人當成寶，港人就當係草，咁搞法，又點發展創新科技產業呀。叮！

講到底，連高錕本人都係受害者，正如有科技界人士話齋，如果香港當局唔係缺乏遠見，及時扶持高錕，就唔會錯失就地發展光纖通訊嘅機會，令香港科技產業落後於人啦。難為當局仲好意思叨高錕嘅光。

所以話，當局對高錕表示敬意，其實係為咗掩飾自己唔重視科研造成嘅惡果，所謂將創新科技發展為未來新興產業，更係自欺欺人。煲呔曾，唔好再做抽水之王啦。