小白觀點：酒後執法係常規訓練

依家啲警察真係識飲識食，繼日前有長洲分區刑事支援組部分人員懷疑當值期間飲啤酒食海鮮，灣仔警署班阿蛇都唔執輸，仲名正言順大搞啤酒派對，大Sir散仔冇分階級齊齊劈，犀利咯，兩小時狂隊過百支啤酒，啤妹執酒樽都執到手軟，不知幾咁豪氣呀。

點解啲警察特別需要當值期間飲酒呢？呢個係好值得研究嘅問題，小白老弟認為，極有可能係警察常規訓練之一，狂歡Party之後，一大班隊完啤嘅警官冇暈低又或者蛇王返屋企瞓陣，而係繼續執法，嗱，呢啲咪就係叫紀律囉！正如就臨退休嘅警務處副處長任達榮嘅講法，警務人員必須有正直及誠實的品格，今次灣仔警署班警察飲得就理直氣壯，計我話，警察叔叔捉唔到鏹魔係其次，只要飲完酒之後冇揸槍亂咁射，足見酒品好，差品自然好。

Blog：http://sunsiupak.blogspot.com

阿豪觀點：咁識歎可做旅遊大使

警隊又爆醜聞！繼水警歎海鮮後，灣仔警署日前又被爆以賀新春為由，大搞啤酒派對，短短時間掃光咗過百支啤酒。唉……香港警察不如轉行旅遊大使，宣傳香港好飲好食嘅地方仲好過。唔怪得市面咁多餐廳食肆，喺當眼處放有警隊logo嘅飾物啦，原來當Q嘜標誌咁用……當值時間飲酒，真係離晒大譜。萬一有人發酒癲，係街度亂咁fair，咁就死得人多啦。唔好唔記得喎，警方一早將警署對出嘅咪錶封晒，即係話會有好多警員揸車走人啦，嘩！休班警醉駕，你都咪話唔大鑊！

不過大家又唔使太為差大哥們操心，之前都發生過師姐涉嫌酒後駕駛，好在負責調查嘅伙記醒目，竟然容許佢左拖右拖兼夾狂灌清水。係喎，如果醉駕師兄師姐，又咁巧嚟調查嘅同事又係飲到pair pair夫，咁就真係有好戲睇嘞！

Blog：http://lukchiho.blogspot.com

網友觀點……

曹探長：隊啤都剝咗制服先啦，有冇顧吓個形象㗎？

福　伯：識飲識食係警隊新形象！

勤：咁盛智文做一哥啦！

杞　人：隊咁多啤若有突發事件，點去有效處理呀？

公　安：個指揮官簡直想靠害？叫班伙記飲多啲。