原來喺啱啱過咗嘅農曆年，香港青聯主席Rock陳仲尼、遠東發展主席邱德根細仔邱達根、黃英豪細佬英傑同英敏、胡關李羅律師行其中一個合夥人關卓然嘅仔等名人二代，都不約而同與家人去咗日本北海道滑雪勝地二世古（Niseko）滑雪。
二世古以powder snow（粉狀雪）聞名，廿四孝老公阿Rock孖住太太區海倫同九歲及六歲大嘅囝囝，過咗一次親子之旅。佢講笑話兩個仔有教練從旁教路，學得特別快。阿Rock喺二世古滑雪冇戴頭盔，返到香港睇報紙，知道皇仁生喺韓國滑雪遇意外先知驚，話以後滑雪要戴頭盔。
邱達根亦同太太、兩個仔去二世古玩個夠。今次係佢人生第一次滑雪，佢謙稱喺雪地上不知所措，識滑雪嘅太太就自得其樂，三歲嘅大仔就上小童滑雪班，未夠一歲細仔由傭人照顧，一家四口各得其樂。黃英豪冇同兩個細佬去二世古滑雪，佢話三個喺英國讀書嘅仔女可以放假返港過新年，一家六口難得喺晒香港，所以邊度都唔去。