財爺鬍鬚曾尋日出席港大一個預算案論壇想認叻，話上年取消咗紅酒稅，增加咗唔少就業機會時，全場嘅燈忽然熄晒，真係好邪！佢竟然喺度搞Gag，問港大係咪冇交電費，點知就畀港大高級名譽研究員、之前有傳同鬍鬚曾不和嘅政府前經濟顧問郭國全窒，話因為政府冇畀電費津貼大學喎，搞Gag反畀人寸爆，鬍鬚曾惟有黯然收聲。
其實佢抵畀人寸嘅，正如佢每年預算案都例牌估錯數，今年嗰份仲特別離譜，喺論壇度不斷畀班學生質疑，批評預算案冇長遠扶貧措施，又冇增加大學嘅津貼學位。
跟住佢再去青協搞嘅論壇，有學生問佢鍾意食乜？佢就一臉尷尬咁話鍾意食朱古力，所以好多同事都鍾意去佢間房度開會喎。此話一出，主持即刻贈佢一句：「原來你平時都派糖，唔怪得之你咁鍾意派糖啦！」佢當堂無言以對。
中大尋日出咗最新嘅民調，發現有三成一嘅弱勢社群覺得預算案冇照顧到佢哋，只有二成八嘅人覺得有；而中產就更慘，有四成四人覺得預算案冇料，仲有近六成人認為新預算案無助提高佢哋對政府嘅管治信心添。查實心水清嘅市民都知道呢份預算案冇料到啦，鬍鬚曾再搽幾厚嘅面懵膏都係冇用㗎嘞。