身兼全國政協委員嘅肥胡，尋日起程上京準備開兩會，前日臨走前都好忙，佢朝早同立法會議員黃宜弘結伴完成千八米渣打馬拉松，中午就入馬場輕鬆吓，好耐冇拉頭馬嘅佢，開到口話希望馬場有奇迹，點知話口未完果然開口中，「八逢九紫」喺第五場勝出，呢匹愛駒係肥胡同兩個老友夾份，前日三人行觀戰，睇見愛駒衝線一刻，肥胡肉緊地大叫一聲：「搞掂！」三十六萬獎金袋袋平安嘞。

拉完頭馬後，肥胡急急腳走人。趕去邊？原來係走上廂房開香檳。佢話自己身為馬會遴選委員，按照傳統慣例，每逢勝出頭馬都要上廂房開香檳賀吓，佢索性益街坊一口氣開夠六支，認真豪氣。