02/03/2010

播放本新聞相關短片

政情:CY真情對話變獨腳戲

行政會議召集人CY梁振英尋日到香港公開大學主講「高等教育何去何從」,大會原本安排CY演講後再同啲學生對話,但佢遲大到令講座遲咗二十分鐘開始,加上佢一開口就講唔停,最終只預留五分鐘答問時間,台下得一個學生有機會發問,令「真情對話」慘變CY獨腳戲。

CY先後做嶺大同城大嘅校董會主席,講高等教育開正佢個瓣,所以由個人經驗、教育目標到搵工,一口氣講成四十五分鐘冇停過口,講到幾乎過時,結果只有學生會代表有機會問CY點幫公大爭取納入大學教育資助委員會受助之列。有一個身兼青年論壇元朗區主席嘅公大學生事後批評:「真情對話得一個人發問,咁算乜真情對話?」

不過,CY霸晒啲發言時間其實情有可原,事緣佢演講前叫學生講吓大學科目同事業嘅關係,結果全場鴉雀無聲,到佢演講時,更有唔少學生瞓晒覺,或者佢覺得反正啲學生都唔投入,所以索性自己講晒好過。