商務及經濟發展局前局長馬時亨離開咗官場就嚟兩年，但大家都冇忘記呢個政治手腕圓滑嘅前局長。尋日邀請佢上電視節目嘅白鴿黨副主席劉慧卿都讚揚佢做官時搞出個「仙股事件」，初時民怨沸騰，但佢致歉後民望又由谷底反彈，終於喺高峰時辭官，為官場生涯畫上圓滿句號。卿姐借勢抨擊政府依家搞出個爛攤子，仲問佢點睇添！

肥亨初時大遊花園，話佢支持政治問責制，因為可以招攬唔同背景嘅人為政府効力。但係啲副局長同埋政治助理知名度低到冇陰功係事實，佢哋之間又唔多相識，仲要夾硬話係團隊，連肥亨都忍唔住感嘆話，要令問責制符合大家期望牽涉好大手術㗎，需要高人指點。不過，佢冇講到誰是高人同埋個手術應從何做起。