每塊300蚊P住搶

日前地政總署向現任嘅立法會議員發出通告，話要配合立法會補選，叫佢哋喺今個月十五日前拆番依家掛喺街嘅宣傳品，以便騰出呢啲地點，畀參與補選嘅候選人展示佢哋嘅競選宣傳，若果唔拆嘅話，當局就會幫佢哋拆，之後收番清拆費。地政總署仲話喺六月一日後，佢哋可自行將啲宣傳品擺番喺原位。

嘩！拆完又掛，好好玩呀？班議員即刻反彈。工聯會新界西地區直選議員王國興話，咁搞法可謂一闊三大，又要搵人幫手拆，拆唔切又要科水畀政府，咁樣簡直勞民傷財啫！佢大大話話有五百幾塊街板，拆都有排拆，仲有就係由政府拆板，每塊由一百至三百元不等，條數好襟計。

就算係零售及批發功能組別議員方剛都覺得唔多妥。佢話補選有爭議，有同僚仲話要否決補選經費，而政府事前冇講過就發出拆板通告，做法唔多妥囉！仲有就係佢預咗啲街板掛四年，好多都係木製嘅，依家拆咗落嚟好易爛，亦唔知邊度有咁大嘅地方擺放，所以佢會約見政制及內地事務局局長林瑞麟，要求政府支付拆板費喎！

公社兩黨攪局，嘥公帑之餘，依家仲好似喺班舊同僚個袋度搶錢咁，咪以為現任立法會議員荷包「傷」，雙料議員更「傷」，事關連區議員嘅宣傳街板都要拆晒，清場嘛，聽聞有啲區議員都「拗拗聲」，仲批評呢次補選，剝奪咗佢哋畀市民嘅地區資訊。