咁就奇嘞，政府五年前就已經決定關閉旺角街市，點解依家仲未安置好啲商戶？聽吓商戶點講。佢哋話喎，食環署當初應承過，喺競投新檔位時畀佢哋優先揀位，但依家又反口，話根本冇呢回事。商戶梗係慶啦，咁咪打死都唔肯搬囉。

食環署又係嘅，作為政府部門，點可以口輕輕㗎，講咗唔算數，政府仲有乜嘢公信力呀？如果商戶嬲起嚟硬係唔搬，好似內地嗰啲釘子戶咁撐到底，睇你哋點收科。

講番轉頭，關閉旺角街市並冇錯，而且一早就應該咁做。審計署嘅審計報告早就將旺角街市列為「不太興旺」嘅公眾街市，繁忙時間只有十幾個檔位營業，場面冷清。其實，呢個街市喺正鬧市，四圍都係商舖同攤檔，乜嘢都有得賣，唔使入街市就可以買齊晒要買嘅嘢，唔拍烏蠅至奇。所以政府○六年就決定關閉，點知食環署懶懶閒，拖咗五年幾都搞唔掂。

喂，個街市唔係話空咗就空咗，每個月要用八萬幾元公帑維持，五年加埋就係五百幾萬元。更得人驚嘅係，全港有大量攤位空置嘅公眾街市，唔係得一兩個，數字顯示，食環署轄下公眾街市每年一共虧蝕一億六千幾萬元。

叮！呢啲公眾街市唔單止空置率高，管理更係立立亂。本報曾踢爆，有啲街市直情變咗停車場，嗰啲檔主將電單車停晒入裏面，話係為咗方便送貨喎。有啲空置檔位就變咗貨倉，堆滿貨物；有啲變咗宿舍，商戶張開尼龍床喺度瞓大覺；有啲仲變咗晾衫場，掛到好似萬國旗咁款。食環署職員唔知係咪發雞盲，根本當冇事。

有啲商戶更離譜，將啲檔位分租出去，賺番一筆，食環署居然矇查查。

香港寸土尺金，食環署擁有近百個公眾街市，如果換咗係第二個，一早就賺到盆滿缽滿，但依家年年蝕錢，成億成億丟落鹹水海。你話班官僚係咪敗家仔？

叮佢個鎯鎯，咁搞法，幾多錢先至夠佢哋敗呀？計太一叮話齋，既然政府用咗五年都解決唔到街市空置問題，不如壯士斷臂，將呢啲吊鹽水嘅街市摺埋晒罷啦。咁樣唔單止可以增加政府土地資源，仲可以將食環署嗰班冗員炒晒，慳番大量公帑。