理文造紙主席李運強同埋公子Edmond李文斌尋日入馬場撐愛駒「包裝大師」，雖然愛駒最終冇跑出，但兩父子一樣咁開心。
社交界早前已傳出Edmond太太何芷韻夢熊有兆，咁當然要恭喜佢。佢喜形於色話太太情況好好，仲自爆今次「打孖」嚟，即係老婆懷咗孖胎，預產期大約六月，佢已經安排老婆喺嘉諾撒醫院迎接新生命，至於係男定女就保持神秘，話遲啲生咗會話畀大家知啦！喺賽事結束後，佢即刻急急腳走人，睇怕係返屋企陪老婆啦！
理文造紙股價近排勁升，李運強笑不攏嘴，好有信心咁叫大家留意七月份，屆時會有好消息公布。七月係理文公布全年業績嘅時間，舊年公司雖然賺三億幾港元，但大幅倒退八成，今年佢咁有信心，梗有「報復性」反彈啦！