事緣內委會補選前，波波曾發信畀中大學生會，質疑對方「大細超」，偏幫對手余若薇，而喺波波當選後，學生會翌日即刻「還拖」，發出公開聲明強烈譴責波波，班同學仔喺公開信用嘅言辭辛辣，形容波波做「尊貴的議員」，又話對佢作出捏造事實等卑劣行為蒙羞。學生會仲質疑波波做咗校董後，會唔會有容人之量聆聽唔同立場嘅意見，又要求佢公開道歉。

波波尋日知道自己被狙擊後，嘆咗一口氣話唔想作口舌之爭，公道自在人心，讓時間、事實說話。佢仲理直氣壯咁話做議員應該講乜就講乜，佢當選前出信質疑學生會正正係體現呢種態度。

聽佢咁講，擺明係唔「赦」學生會啫！不過，波波擔唔擔心日後同學生會溝通有問題呢？佢話唔擔心，希望大家可放低成見向前看。