本文重點
白鴿黨元老司徒華同前行政局首席議員Lydia鄧蓮如勳爵不約而同喺尋日元宵擺壽酒。闊別政壇多年嘅Lydia一直記得自己同華叔嘅生日只差一日，仲送蛋糕賀壽添！華叔同Lydia喺上世紀八十年代相識，當年Lydia係立法局首席議員，曾當眾稱讚華叔政治了得，因為華叔令佢明白，政治上預計可以成功爭取嘅，就要大大聲話爭取，如果冇把握就唔好咁大聲嘞。
華叔化療後中氣十足
華叔喺旺角一間酒店慶祝七十九歲生日，一班白鴿黨嘅黨友、教協同工及數十位舊學生來個「羅漢請觀音」夾錢為佢賀壽。患上第四期肺癌嘅華叔接受完兩次化療後情況穩定，致辭時中氣十足，仲一口氣吹熄蛋糕上嘅蠟燭。
華叔致辭時感觸良多，更引述名作家魯迅名句「人生得一知己足矣」，話自己比魯迅幸福千百倍，佢相信喺各方好友支持下會戰勝病魔，十年、二十年後會繼續同大家慶祝生日。
另一邊廂，Lydia喺灣仔一間酒店賀七十歲生日。佢出生日期係一九四○年二月二十九日，同佢一樣屬龍嘅前政務司司長陳方安生同佢嘅孖生妹妹方寧生齊齊吹蠟燭，政界猛人齊撐場。
問Lydia對香港出現連番政治爭拗有乜睇法，佢話對香港社會發展好樂觀，但生日就唔講政治嘞。