歸田園居 蝕咗百萬

工聯會內好多人都知，潘佩璆愛與花草為伍，雖然未至於東籬採菊咁詩情畫意，但話佢愛好田園生活就一啲都不為過，所以佢九六年由新西蘭回流香港時，就特登揀喺遠在深山嘅粉嶺置業，但要做現代陶淵明，代價都唔細，大拿拿要一百萬元。

潘佩璆話間屋九六年樓市高峰期時買，價錢三百七十幾萬元，好快變成負資產；由於位處偏遠，近年樓市無論點樣火熱朝天，佢都無大得益，上星期屋苑同一面積單位出售，售價都只係二百八十萬元水位，有排未返到家鄉呀。唔知佢屋企有冇種苦瓜呢？若果有就認真應景嘞！

佢本身係公立醫院顧問醫生，大仔同新抱亦係醫生，細仔係律師，有咁嘅家庭環境，大家毋須為佢擔心。上年五月，潘醫生仲喺旺角買多一個四百呎單位，為嘅係方便同搬出市區嘅兩個兒子相聚，有個「行宮」過夜，而新單位最近升值三十萬元，算係幫補番啲啦。

問身為業主嘅佢點睇預算案嘅穩市四招，佢表現得毫不在意，仲話預算案嘅其中一招，即係提出嘅活化居屋二手市場措施，作用相當有限，住緊居屋嘅業主，好多都唔會因為有新措施就換樓，所以措施係咪激化到居屋二手交投量都未知，更遑論對私樓市場有乜嘢好處啦。

如果穩市四招真係壓抑到樓價，咁潘醫生粉嶺層樓個價咪更難望到家鄉？潘醫生話冇所謂，揀喺遍遠地區置業，享受鄉村野趣，付出小小代價就預咗啦，如果樓價真係再跌，冇辦法，惟有認命啦。