小白觀點：港英餘孽衰過董建華

有雜誌首度公布香港最受信任人物及行業調查，睇睇城中八十位名人嘅排名，咁當然啦，煲呔曾爵士搞到香港立立亂，衰衰哋都可以叫臭「名」遠播，可以列入為名人堂，咁你哋估佢老哥排第幾？排第一？發夢冇咁早，再輪迴多十世都冇可能呀！算啦，開古嘞，登燈燈櫈，係排第四……由尾數番轉頭呀，即係尾四呀，比起香港人嘅集體回憶董建華，仲要低四位，亦係主要官員排名最低，名副其實貼晒地。

話時話，煲呔曾衰過董建華其實有乜出奇啫，呢位老哥係港英餘孽，飲英國事頭婆嘅奶水長大。喂！天地良心，佢從來冇話要為香港盡心盡力喎，之但係一早就事先張揚講到明係打份工，前排仲鬼拍後尾枕好老實話等退休添，你話有一個新正頭見到佢個樣都覺得唔吉利嘅政治家喺度，香港想有運行都難喇！

e-mail：sunsiupak@gmail.com

Blog：http://sunsiupak.blogspot.com

阿豪觀點：瞌眼瞓扮嘢冇公信力

某雜誌進行調查，了解香港人對名人同眾多行業嘅信任度究竟有幾高，結果發現曾蔭權排名尾四，比董建華仲要低四位。至於行業方面，立法會議員喺四十個行業裏面僅排名三十，可信程度低過廚師及髮型師，近期屢涉官非嘅算命師更加係包尾大幡。

嘩，真係好耐都冇見過咁令人信服嘅調查啦。曾蔭權衰過老董，呢個已經係毋庸置疑嘅事實啦，啲人成日形容老董係新界嘅牛，起碼都夠勤力呀嘛，唔係點會有「七十一」呢個花朵呢？但係你睇吓煲呔曾呀，成日諗住做夠鐘退休唔使撈，就連中聯辦酒會，台上致辭佢都可以瞌眼瞓嘅。咁都未算最衰，佢釣完近十秒魚之後，仲喺度扮若無其事，又點頭又微笑，懶專注咁。唉，錯就要認，打就要企定，咁小嘅事都要扮嘢，仲有咩公信力可言呀？

e-mail：lukchiho75@hotmail.com

Blog：http://lukchiho.blogspot.com

網友觀點……

算命師：若「政府官員」包括在調查 行業內，我哋實唔會包尾！

阿吉：煲呔曾同啲議員嘅表現，很難令市民信任得過佢哋喎。

海公公：董伯伯都會急市民所急吖，阿曾做乜都慢幾拍。

陳福水：點解煲呔曾畀人嘅感覺係永遠是錯的？

有料爆：

又有地震，快啲搵定隻挪亞號先！

SMS傾埋一份：6016 2496