以石硤尾邨美荷樓為例，呢座五十年代建築物係香港最早嘅公屋，亦係碩果僅存嘅Ｈ型徙置樓，可以講係一個人文博物館，充滿香港人嘅集體回憶。當局計劃將美荷樓活化成青年旅舍，呢個計劃本來唔錯，既可以保存建築物，又可以令外地旅客體驗吓五、六十年代香港公屋居民嘅生活。之不過，按照當局嘅規劃，美荷樓中座要拆卸重建，以容納電梯同樓梯。同時，仲要拆卸最有特色嘅走廊，將石屎欄河全部變成玻璃欄河。而部分單位仲會打通，用嚟做咖啡室、便利店同洗衣房等等。咁即係話，美荷樓經過「活化」後將會面目全非，得番個外殼係原先嘅。

唔怪之得有區議員話，計劃令美荷樓「走樣」，失去以往公屋半腰石屎欄河嘅特色，唔可以接受。話時話，保育歷史建築物，無非係想保留原有風貌啫，依家咁搞法，根本唔係活化，而係死化，係假保育，真破壞。叮！

其實，面目全非嘅唔止美荷樓，例如灣仔藍屋被當局評為一級歷史建築，按法例規定，一級歷史建築就係「具特別重要價值，須盡一切努力予以保存嘅建築物」。但結果卻係，當局唔理保育人士反對，拆咗超過八十年歷史嘅木樓梯，理由係木板已畀白蟻嚴重侵蝕，點知拆完之後發現所謂白蟻根本係子虛烏有，你話幾搞笑。

講開又講，保育歷史建築物嘅其中一個目的係畀人參觀，之不過當局一味向錢看，將唔少歷史建築物商業化，變成高級餐廳、酒店甚至傢俬舖，唔止完全失去原來嘅神髓，更加由於呢啲場所收費不菲，普通市民只能望門興嘆，唔知究竟保育嚟做乜。

有位前國家領導人曾經用紫砂茶壺嚟形容香港，佢話茶壺裏面嘅茶垢係好嘢，就算唔加茶，水中亦有茶香。佢提醒港人要保留原有嘅特色，唔好將茶垢洗咗去。其實香港好多歷史建築物就係紫砂茶壺，弊在當局唔識珍惜，亂洗一通，簡直係愚不可及。

講到尾，保育唔止保護建築物，更重要嘅係要保護歷史及文化，香港呢班官員不學無術，只識趕潮流、講時髦，有乜法子唔搞到不倫不類吖？叮！