冬季奧運會對香港人嘅吸引力冇咁大，不過，瞓身搞體育嘅霍家就好重視，立法會體育界代表霍震霆就趁農曆年同囝囝啟剛、啟山結伴去溫哥華，為冬季奧運會開工，啟剛仲被影到同貴為「跳水女王」嘅女友郭晶晶甜蜜蜜咁出席開幕禮添。從溫哥華歸來後，前日啟剛陪爸爸出席中聯辦新春酒會，但佢一聽到人哋問起「晶晶」，就笑笑口唔出聲。
咁啱得咁蹺，霍震寰亦與雪有緣，一月份佢同老婆帶埋囝囝啟文同啟中去咗瑞士St. Moritz滑雪，囡囡思緯就缺席，雖然五缺一，但愛滑雪嘅霍震寰一樣玩得咁開心。佢哋一家人平時忙到分開幾個國家生活，去旅行先可以形影不離幾日。
霍震寰又話，佢滑雪多年，但每次都係做足安全措施，總之玩得開心，亦要安心至得。