今日開跑嘅渣打馬拉松已成為城中一年一度嘅盛事，甚至吸引挑戰者年年參加，其中一個就係有多年參賽經驗嘅新界東聯網總監馮康嘞。馬拉松賽事消耗嘅體力好大，已報名參加馬拉松全程嘅馮康早前就發揮醫生專長，早早分析定天氣同擬定作戰策略，佢咁精明，今日實可以早早舉定「V」字手勢啦！
馮康話，今年賽道有變，尤其昂船洲大橋嘅賽道特別斜，加上天文台預告今日濕度隨時高達百分之九十五，氣溫仲熱到二十幾度，佢擔心今日跑起上嚟應該幾辛苦，所以擬定策略，落場時會錫身啲，唔會夾硬嚟。佢仲透露，備戰時除咗拉筋同緩步跑外，接近賽事日子又會食多啲健康、有營養嘅食物，儲定能量應付比賽。
其實，今年醫院管理局七大公立醫院聯網中，最少有兩個聯網總監參賽，馮康之外，仲有候任港島西聯網總監嘅陸志聰醫生，陸醫生下個月就會去美國哈佛大學深造管理課程，但佢都打算參加半馬賽事。