警隊二哥任達榮將喺禮拜五退休，尋日首次以檢閱官身份主持警察結業匯操，佢嘅影星細佬任達華帶埋太太琦琦同埋千金小晴佳撐場，任Sir嘅仔女更紛由外國飛返嚟支持爸爸，令佢好欣慰。本身係名模嘅琦琦尋日拎起相機為大伯一家同賓客影相，好似粉絲咁，晴佳就古怪表情多多，零舍搶鏡。
任Sir位公子喺外國讀藥理，依家喺柏林做嘢，囡囡則喺外國讀心理學，一家人尋日喺黃竹坑團聚，認真難得。任Sir之前話過，旅遊唔係佢嘅興趣，去勻全世界，最鍾意都係香港，退休後會先裝修間屋，閒時會打吓乒乓波同畫國畫。佢仲透露，最近同細佬一樣愛上影相，或者兩兄弟遲啲會嚟個影畫展Crossover。
至於好耐冇見的李明逵捧完警隊場後，又去咗中大榮休教授金聖華嘅新書發布會，但佢戲言自己退休前揸槍，退休後就揸鑊鏟，個肚冇半點墨水。