鬍鬚曾發表咗預算案之後，頻頻出席電台節目推銷，由於佢舊年年尾先緊急入院做通波仔手術，所以去到邊都有唔少人關心佢嘅身體狀況。不過，呢個話題亦成為鬍鬚曾迴避敏感問題嘅藉口之一，尋日朝早，有人問佢會唔會參加下屆特首遊戲時，鬍鬚曾忽然爆句：「咁早……唔好咁刺激我啦！」
佢心臟有事係人都知，但政圈人士一般都會盡量淡化自己嘅身體狀況，避免影響錦繡前程，點知鬍鬚曾攞自己個心臟嚟過橋，仲一連重複兩次，點都唔肯答下屆參選問題。
其實，鬍鬚曾呢句「刺激我」有兩層含意，一係呢個議題太有爆炸性，過於刺激；一係呢個職務對佢嚟講太過刺激。點都好，佢嘅表態都透露咗自己唔襟激，小心身子呀！