本文重點
為期兩個禮拜嘅人大政協「兩會」禮拜三（三月三號）就開鑼，立法會中嘅雙料成員又要京港兩邊走，今年建制派一早部署，飛嚟飛去嘅情況應該大減，因為下月十號嘅立法會大會全部動議辯論都係建制派嘅，畀人「施襲」機會大減，只係禮拜三嗰日，公文袋黨魁余若薇會提個叫市民積極參與補選嘅議案，建制派為此留人開會，以防萬一。
今屆立法會有十四個議員身兼人大代表或政協委員職務，立法會主席逢禮拜三立法會大會就會向北京請假返港主持會議，其他十三人多數都會上晒北京開會，加上泛民有五個議員玩辭職，立法會流會可能性唔大。而下月十號嘅大會由建仔嘅陳克勤同中總立會代表黃宜弘抽到動議議題，建制派議員都唔使兩頭騰。
留人應付余若薇
至於余若薇嘅議案，雖然字句中冇所謂「公投」等敏感字眼，但建制派以防萬一，據悉會由工聯會同建仔留人喺香港開會，情願遲過政協開幕日先上京，咁就安心又放心嘞。