前高官葉澍堃（Stephen）退休後變身城中「新食神」，得閒入吓馬場、打吓麻雀、歎吓美食，生活優哉游哉。早前農曆年初七，佢就同立法會議員「大舊石」石禮謙打台灣牌，結果Stephen一家贏三家，激戰八圈後，Stephen袋咗六百蚊，如果當日注碼大啲，佢啲雀友就損失大囉。
Stephen開頭幾圈仲輸緊三千幾蚊，但後來時來運到，倒贏六百蚊，於是諗起「新界王」劉皇發喺車公廟求得嗰支「先難後易」嘅中籤，估唔到打牌都應晒。年初八，Stephen再嘗試到「先輸後贏」嘅運，當日入馬場，跑到第五場佢仲輸緊，點知第九場佢就反敗為勝有得執！
