非原居民唔一定就範

張學明尋日同傳媒拜年，講到鄉議局大樓仲差五千萬先埋到尾時，佢透露近日瞄準政府今年四月起開水喉向村代表發放嘅每季二千元車馬費津貼，雖然細眉細眼，但新界有成一千五百名村代表，每年涉及嘅政府經常開支成一千一百八十七萬元，四年就要四千七百幾萬，捐一半畀鄉議局，都有二千三百幾萬元，絕對唔嘢小。所以張學明話，如果揼心口成功，鄉議局大樓就冇憂啦。

條橋雖然好，但啲村代表肯唔肯呢？張學明話，相信班村代表都會好樂意捐款，因為局方為村代表爭取權益，而村代表支持鄉議局，大家都應該互相幫忙喎！之但係，原居民村代表支持鄉議局就話飲水思源啫，但班非原居民村代表又點呢﹖佢哋會唔會都樂意捐出津貼呢？咁就好難講嘞，而且捐錢係冇得逼㗎，睇怕鄉議局都唔可以諗實二千幾萬一定到手。

發叔、張學明為咗鄉議局大樓周圍撲水，上個禮拜二先拉隊同劉鳴煒見面，當日雖然冇好消息，但事隔幾日已獲劉鳴煒捐錢，難怪發叔尋日顯得好開心，仲話佢同劉鳴煒大家都姓劉，等於兄弟一樣，總之佢代表新界人答謝佢哋支持啦！