小白觀點：係時候打倒一台獨大

某間收費電視台奪得世界盃本港獨家轉播權，出陰招唔畀兩間免費電視台播，亦即係話，今屆世界盃再冇免費波睇嘞，要睇就乖乖磅水啦！

老實講，本欄對足球冇乜興趣，除非叫番泰利做英格蘭隊長，公然喺球場上力戰十一個集郵女啦！問題係，今次嘅情況好唔同，原因好簡單，近年香港嘅免費電視台好唔健康，一台獨大嘅問題愈嚟愈離譜，聽聞有免費電視台因發射站故障，搞到大半個鐘頭冇電視訊號，最奇怪嘅係，令人好有集體回憶嘅雪花畫面，收視率竟然仲高過對手嘅正常節目。由此可見慣性收視嘅恐怖，在於播乜都有收視，難怪佢日日餵觀眾食垃圾，你又吹得佢脹咩？不過另一間又實在太唔爭氣，計我話，不思進取都一樣係抵死，今次天有眼，終於有人出嚟收拾免費台，唔係球迷都舉腳支持！

e-mail：sunsiupak@gmail.com

Blog：http://sunsiupak.blogspot.com

阿豪觀點：大龍鳳好睇過足球賽

世界盃六月開鑼，好多人關心究竟有冇免費波睇。老實講，對於忠實球迷嚟講，無論畀邊個電視台轉播，都會諗方法去畀錢睇；而對於好似豪伯呢一類湊熱鬧嘅塘邊鶴而言，世界盃係四年一度嘅全球盛事噃，亦會關心揭幕戰、四強賽同決賽呢幾場免費賽事。

不過咁，依家三大電視台就賽事轉播權大鬥法，真係隨時仲好睇過足球賽本身，好似兩個免費電視台咁，佢哋不嬲唔係咁妥對方，今次係咪有機會團結一致、抵禦外侮呢？之前又話「反霸權」，又話「反壟斷」，嘈到拆天咁，好嘞，依家有晒機會畀你騷哥利嘞，點解唔打番場漂漂亮亮嘅仗，證明自己嘅超班實力絕對可以為廣大人民服務呢？如果最終可以直頭攞番成個轉播權，大家唔單止拍爛手掌，豪伯仲第一個全日長開你個台添呀！

e-mail：lukchiho75@hotmail.com

Blog：http://lukchiho.blogspot.com

網友觀點……

扼殺港足：唔係所有家庭都願畀錢睇波，細路對足球嘅興趣培養唔到，仲講乜發展足球？

老　　哨：就算免費電視有得播都得嗰四場，根本滿足唔到真正球迷！

電視王：有線今次都去得好盡喎，明剃兩台眼眉啦，做得好！唔使成日一台獨大，悶到死！

工廠會計：財爺咁關懷綜援人士，最好加埋睇世界盃津貼啦！

有料爆：

元宵佳節去睇綵燈會！

SMS傾埋一份：6016 2496