嗱，喺的士站啱啱上車就撞正紅燈，但成分鐘前面人影都冇個，只見咪錶跳唔見車郁，而且次次都係咁，唔慶至奇。咁嘅經歷，近排喺九龍塘港鐵站隔籬多福道的士站搭過車嘅市民一定有過。

運輸署舊年十月喺嗰度加設行人過路處，的士站前面無端端戙支交通燈「阻礙交通」。本報記者去現場計過，紅燈平均每次着一分十秒，但綠燈每次得二十秒，只夠五架車通過，的士同乘客排晒長龍。

如果設計真係有助交通安全無可厚非，但加裝交通燈嘅過路處好少人行，盞交通燈不但發揮唔到作用，反而喺度阻頭阻勢。

以前的士喺站頭等幾分鐘就有客，依家要等十幾分鐘，因為乘客索性轉去鄰近的士站搭車，司機冇啖好食，乘客亦因為等轉燈要多畀車資，費時失事。唔怪得盞交通燈戙咁耐畀人鬧足咁耐啦，叮！

運輸署交通燈設計唔掂，行人隧道設計同樣白癡。嗱，旺角亞皆老街同登打士街之間嗰段彌敦道，頭尾兩個行人過路處相隔幾百米，中間得一條行人隧道橫跨彌敦道。設計本身已經令途人極之不便，最荒謬嘅係，隧道唔止冇殘疾人士專用線，連升降機都冇。有區議員直斥運輸署多年來無意改善，等同於歧視長者同殘疾人士。唔知成日不務正業嘅平機會，敢唔敢攞運輸署署長黎以德嚟祭旗呢？

坐的士同過馬路都畀政府搵笨，就算企喺路邊等巴士，一樣畀運輸署靠害。嗱，當局喺青衣楓樹窩路迴旋處轉入青衣鄉事會路口設立巴士站，而且一排有十三個咁多。嗰度臨近工業區，每日會有大量貨櫃車出入。按運輸署嘅設計，巴士同貨櫃車使用同一條行車線，結果繁忙時間貨櫃車一架架喺等巴士嘅市民前面飛過，乘客要等一大輪至上到巴士，而且貨櫃車同埋站嘅巴士仲成日爭路，險象環生。

叮！呢啲得啖笑嘅交通設計，好明顯係運輸署閉門造車諗出嚟㗎啦。但署方回應本報查詢時死撐話冇做錯，仲話「交通運作正常」添。唉，連交通設計為乜都未搞清楚，佢哋話交通正常，鬼信咩！

有立法會議員話，經常收到有關本港交通設計不當嘅投訴，但當局根本無心聽取意見。運輸署設置交通設施前，只會收集區議會嘅意見。搭的士、過隧道、等巴士嘅係普通市民，對呢班真正使用者嘅意見不屑一顧，淨係走去區議會做吓諮詢騷，唔怪得運輸署交通設計不切實際，路面暢通變路路不通啦。叮！