本文重點
眾所周知，已辭職嘅立法會前議員Tanya陳淑莊有固定男友，但原來男友得來不易，皆因媽咪揀女婿嘅準則仲奄尖過佢，要求男仔頭髮要企理乾淨，又唔可以有鬚根，最搞笑係唔鍾意男人着白襪襯黑皮鞋，認為咁嘅配搭超古怪。
Tanya尋日同傳媒講起陳媽媽一直管教甚嚴，逢親有男仔打電話去屋企就大為緊張，而且會扮到好惡咁要求對方道上名來，但當知道電話中人係阿女嘅老友或冇可能發展成情侶嘅男性朋友時就會口氣一轉，不知幾客氣，搞到佢哭笑不得。
要阿女三十五歲前嫁一次
雖然管教咁嚴，但陳媽媽竟然叫阿女要喺三十五歲前嫁一次，因為佢認為女人如果到三十幾歲都未結過婚，男人會覺得呢個女人一定有啲問題先會一直待字閨中，搞到冇人敢追。
依家Tanya年將四十仍然單身，但有個拍拖多年兼感情穩定嘅男朋友，唔知咁算唔算聽阿媽話呢？