東區區議會主席丁毓珠尋日出席馬會一年一度嘅十八區盃賽事，講起啱啱同班仔女、女婿去完新加坡返嚟，仲眉飛色舞咁話新加坡比佢想像中多嘢玩，一家人唔單止去咗賭場玩番兩手，仲去埋水上樂園「消暑」添，而且依家新加坡有夜間動物園，夜晚去探動物就唔怕曬親啦。

盧文端盛讚地道美食

全國政協盧文端同阿仔盧金榮、新抱尋日一齊入馬場，原來盧文端亦啱啱去完新加坡避寒，佢一拖三，請太太、外父同外母一齊去新加坡玩足一個禮拜。佢話好鍾意新加坡嘅地道美食，而當地嘅肉骨茶同串燒就更加食過番尋味，成個旅程氹得佢外父好開心。