其實佢出身自一個顯赫嘅家庭，細個有工人貼身服侍，屋企有四個阿媽，一共有二十八個兄弟姊妹，名副其實係大家族。佢話細路哥時日本仔入城，成家人將啲銀紙縫入底褲同鞋入面走難，仲預備定一張尋人啟事，咁就算失散咗都唔使驚，可以登報尋家人。

今年七十七歲嘅韋翁，喺屋企十二個仔入面排第八，佢話以前住嘅大宅淨係地牢都可以容納二百幾人，亦有好多規矩，例如大媽規定非親生嘅仔女只可叫佢做「安人」，二、三、四房嘅仔女亦只准叫生母做「阿嬸」。韋翁話依家啲人食團年飯會買多啲餸，但佢細個時日日大魚大肉，同新年冇乜分別，只係新年多咗啲臘味，真係聽到O晒嘴。

家陣韋翁退下火線，最想係可以安享晚年，但就好擔心政府推出強制驗樓，事關大部分人裝修都冇入則，如果真係要還原單位結構嘅話，一定麻煩到好多人，奉勸政府咪亂搞喎！