本文重點
尋日有個論壇討論醫療保險，有三個反對功能組別嘅青年踩場，喺直播期間指住立法會保險界代表陳健波嚟鬧。陳健波覺得呢幾個青年睇功能組別唔順眼，節目一完就主動搵番嗰幾個後生仔，希望了解佢哋嘅諗法，點知對方原來搞咗個網上電台，仲即場約佢做節目，佢諗都唔諗就一口答應。
改變對功能組別睇法
對方係乜水都唔知，陳健波竟然跟佢哋去北角錄影，途中見有時間仲掏腰包請對方食飯兼分享對普選嘅睇法。佢話晒係保險界出身，口才自然了得，所以佢喺一餐飯嘅時間就令對方對佢改觀，認為佢係另類嘅功能組別議員，仲話將來如果有機會，一定會投票畀佢。
事後聯絡到其中一位踩場青年Edward，原來佢同一班年輕人喺一月中開咗個網上電台，將錄影好嘅節目放上YouTube，佢話陳健波畀到佢一個驚喜，雖然雙方立場唔同，但交流得好開心，改變佢對功能組別嘅睇法喎！