香港嘅愛國愛港陣營近期要壯大力量，係由上而下嘅硬命令，香港建制派收到柯打，點敢怠慢？所以，建仔要搞黨員年輕化、工聯會要開拓直選市場、香港傳統青年組織要銳意革新。至於大大小小、散布社會各階層嘅社團同聯誼會，就要喺日後嘅大型選舉中，更好咁發揮大後方支援角色囉。
雖然距離二○一一年區議會選舉同一二年立法會選舉仲有一段時間，但各愛國愛港陣營社團已暗暗開工，成立會所、凝聚票源，方便數票、掘票同拉票。
繼港區省級政協上月宣布斥資三千幾萬元喺灣仔海外信託大廈買下七千三百呎會所後，由全國政協常委陳永棋揸旗嘅友好協進會，最近亦扑錘租用中環廣場約一千呎舖做會址，月租四萬幾蚊。香港福建社團聯會尋日搞春茗，喺新簇簇嘅北角新會所舉行，嗰度面積近七千呎，使咗三千三百萬元。福建社團聯會主席林樹哲話新會址會用嚟舉辦福建文化活動，歡迎鄉友上嚟聚腳。
據聞，香港其他五湖四海嘅主要同鄉會同社團，都一樣要幫手掘票，大有大做，細有細做，總之無孔不入，一票不漏。