鬍鬚曾喺網誌話成個新春假期都喺屋企準備預算案，喺春寒料峭、細雨紛飛嘅日子，呷一口熱茶，翻閱手上文件，心中感覺反而踏實。不過，市民睇完佢跟住講嘅嘢，心中就好難踏實得落。

佢話每年預算案其實係為咗配合施政報告，作出資源調配，以落實政策，所以理念上預算案一般都唔會提出新政策喎，又話提新政策係政策局工作，財政司司長唔會越俎代庖。按照鬍鬚曾嘅邏輯，但凡前所未有嘅德政，好似貧童互聯網費津貼咁，咪唔關佢事？

外界幫政府計過數，指庫房轉虧為盈，仲可能有逾百億盈餘，但鬍鬚曾閂定後門不特止，仲為自己做守財奴嘅作風自搭下台階，話預算案呢啲資源分配工作，好難做到盡如人意，令所有人都滿意，潛台詞即係講明預算案會大細超，肯定有人被忽略，叫大家咪抱咁大期望，唔係盞自己痛苦。

兜圈讚自己 令人起雞皮

喂，佢似乎唔記得自己係財爺之餘，亦係公僕，一句豈能盡如人意，就可以無視基層困苦？

最令人氣頂嘅係，鬍鬚曾要做守財奴，仲要攞彩過年，話喺嚴重財赤同經濟不景下，仲有能力喺唔使提高稅收嘅情況下，改善現有服務，發展中長期經濟措施，實在不得不讚社會健康理性，認同審慎理財原則，即係兜個大圈讚自己。呢幾日香港天寒地凍，但似乎都唔夠鬍鬚曾呢幾句話咁令人起雞皮。