米老鼠咪畀人擺上枱

香港迪士尼樂園雖然業績見紅，但唔單止員工有人工加，管理層仲有花紅添，真係Happy，令網友Wendy不禁覺得「仲好過打政府工喎！」。平心而論，做迪迪尼冇錯係一份筍工，但有排都未及日日蛇王等出糧嘅政府工喎，嗱，迪迪尼一話加人工，即刻畀全港市民狂插，有冇人可憐吓幫口講句「鼠不聊生」吖？冇吖嘛！

唔係嚇你，依家啲人唔係人咁品o架，睇睇美國吖，日日都有中產怒潮，而且愈玩愈激。香港中產谷咗好耐，仲將佢哋辛苦賺嚟嘅血汗錢咁嘥法，真係唔嬲就假！所以米老鼠呀、雪姑呀、高飛狗呀，唔好咁笨畀人擺上枱，為咗自己嘅人身安全着想，一於同班管理層劃清界線，搵日拉大隊湧去立法會高舉「反加薪」，由巴斯光年做代表義正詞嚴咁宣布：「我哋唔要呢啲不義之財！」到時我同豪伯一定企你哋嗰邊！

樂園奉行美投行哲學

有咩工搞衰咗，唔使賴嘢仲有花紅分？迪士尼高層就係好例子。香港迪士尼樂園業績見紅，唔單止員工有人工加，管理層仲有花紅發添。

豪伯抓爆頭，都只係諗到兩個可能性。第一，迪士尼樂園話到尾都係美國貨，梗係奉行美式管理哲學。咩係美式管理哲學？你睇吓啲華爾街大型投資銀行就知啦，金融海嘯時全靠政府泵水相救撐過危機，點知班機構高層一個屈尾十，咪又係穩袋巨額花紅。呢種咁優良嘅傳統，香港迪士尼班高層又點會唔跟隨呢？

至於第二個原因，就涉及到育兒理論嘞。如果班迪士尼高層係仔女，咁身為大股東嘅港府就係老竇，如果一味靠惡，咁仔女喺學校測驗唔合格，因為怕打屁股，結果只會極力隱瞞甚至掉咗本默書簿。照咁睇，分多啲花紅畀班迪士尼高層，可能都係想佢哋將樂園嘅收支情況、入場人數等更加透明化啫！

網友觀點……

海明：迪士尼蝕到趴地都有花紅分，真係神奇……

傻老鴨：迪士尼作品嘅結局都係皆大歡喜o架啦，咪當係童話咁睇囉！

杞人：咁搞法，迪士尼會唔會蝕到執笠o架？

莊子：傻兄，如果咁計，要香港迪士尼賺個滿堂紅，至係真正大團圓喎……