敬老愛老係中國人嘅優良傳統，民間團體以實際行動向老人家表達敬意，確實令人感動。可惜，民間有情，官府冷漠，當局嘅安老政策口惠而實不至，好多長者嘅生活毫無尊嚴可言，實在令人心噏。

叮，政府自己都識得話，二十年後本港六十五歲以上長者將由目前嘅一百萬人增加到二百六十萬人，佔人口比例由一成三增加到兩成六，如果依家再唔着手檢討安老政策，將來會好大鑊。冇錯，政府左一句「老吾老以及人之老」，右一句「老有所養，老有所依」，講到天花亂墜，比唱嘅仲好聽。之但係，講係一回事，做係另一回事，到底政府為長者做過啲乜嘢呢？勉勉強強都叫做有啲小恩小惠，例如將老人生果金加到一千元，可惜加得不情不願；仲有向長者派發醫療券，可惜每人每年得二百五十元，剝隻牙都唔夠。

其實，政府敬老得把口，莫講話全面嘅老人政策，就連啲濕濕碎碎嘅小事都搞唔掂。呢，政府話就話鼓勵市民供養長者，但今時今日百物騰貴，市民供養長者嘅免稅額，每人每年得三萬元，正式係買糖唔甜，買鹽唔鹹。稅務學會建議，政府應該喺新一年嘅財政預算案增加父母免稅額，減輕子女供養父母嘅負擔。嗱，呢啲就係民意喇，政府聽到未吖！

香港地少人多，市民工作繁忙，唔少年邁長者屋企環境狹窄，無人照顧，希望入住政府資助嘅安老院舍。但係，安老宿位長期嚴重不足，遠遠低於實際需要，搞到每年有逾千位長者等唔到宿位就含恨而終，講起都令人心酸。

俗語話，刻薄不賺錢，忠厚不折本。人人都有老嘅一日，政府對長者咁涼薄，唔通真係唔怕犯眾憎？新年流流，尋日又有一班長者到政府總部門外請願，抗議輪候安老宿位時間太長，促請財政預算案增撥資源，增加長者護理同宿位。

睇怕今年驚蟄，鵝頸橋下又有老人家打小人，打你個無良虐老嘅特衰政府，叮！