阿媽係女人最佳示範

有個香港術數名家衝出世界，幫全球政治人物同企業領袖批命，佢話豐田汽車社長豐田章男今年運程麻麻，因為佢生肖屬猴，咁啱今年係老虎年，所以沖到正，實聽冇運行喎。嗱，呢啲咪叫做「阿媽係女人」囉。

唔知大家有冇印象，當年有位當紅女星病重，記者走去叫一個牙尖嘴利嘅術數大師批吓，佢屈指一算，牙斬斬咁話女星一定捱到過年。結果係點？唔使多講啦。事後呢位大師好嘢呀，面都唔紅咁兜番話，其實一早已經算到有此一劫，不過好難講出口喎。

話時話，美國人不斷投訴，連全球最好賣嘅Corolla都話出事，你就知道今次豐田確實好大劑啦。本欄對術數都略有研究，尋晚半夜幫豐田社長算過，冇錯，佢喺虎年仲有排煩，不過今次呢一劫並唔係因為沖到隻老虎，而係撞正美國總統奧巴馬就真！

風水界形象谷底反彈

風水命理呢啲嘢，信則有不信則無，但係經歷哨牙通事件、茅山師傅性交轉運案後，風水界形象直頭好似煲呔曾民望一樣咁低殘。好衰唔衰，最近又發生解放軍以風水鬼話誘騙中年女文員案。不過唔緊要，據聞香港有位風水師為全球多位政治人物測運程，就連美國CNN都要訪問佢，都可算為香港風水界攞番少少彩。

至於佢有乜高論？哦，咁嘅，羅師傅認為豐田汽車社長豐田章男同老虎沖正，所以運勢不佳喎，又話屬猴嘅人記得佩戴豬形物件傍身喎……

哈哈，準唔準？都係電視節目嗰句例牌菜—風水玄學唔係精密科學，命運始終掌握喺自己手上。其實呢句嘢真係滑頭到冇朋友，嗱，如果唔靈，佢可以話一早警告過你；靈嘅話，就話風水師係靈，都要你主動去搵佢至得，咁命運仲唔係掌握喺你手上？

網友觀點……

傻仔：呢啲嘢我都識得噏啦！

小C9：確係準，好想搵佢改吓運。

陳居士：美國佬點會信呢家嘢？九成係想醜化中國人迷信！

何金水：唔使運用風水命理，有睇新聞都知豐田社長唔掂啦……

山人：豐田社長損失不菲，羅師傅仲乘機抽水攞彩，唉……