本文重點
新春團拜接踵登場，尋日鄉議局舉行新春團拜，變咗畀面派對，有九成問責高官出席撐場，常秘同署長級官員更係十隻手指都數唔晒。主席兼行會成員劉皇發致詞時，對一眾官員禮尚往來，話家吓香港唔係民不聊生，而係官不聊生，事關家吓做官好難喎。不過，口痕友話發叔呢句說話有啲哲學問題，事關官員做得好，點會官不聊生呢？
同民怨係雞與蛋關係？
發叔尋日話：「（我）同情官員好辛苦，高鐵（撥款）都睇到啦，啲官坐咗幾日幾夜，所以咪講啲說話鼓勵同安撫吓佢哋囉。其實市民都幾好做吖，有言論自由，隨時都可以發炮！」不過，正如發叔舊年求嘅車公靈籤籤文話，「禍去禍來因自招」，官不聊生唔通同佢哋表現冇關咩？
官怨同民怨邊樣產生先，可以話好似雞同蛋咁，有啲人為有雞先定有蛋先而拗餐死，但民怨唔會無端端產生，所以官怨同民怨應該係因果關係，若官員表現理想、市民心情舒暢，點會郁吓就批評高官呢？事實上好多市民因官員施政失誤受苦，高官慨嘆官不聊生時，係咪應掉轉諗吓市民生活呢？