特首辦前主任林煥光入主平機會執爛攤子，為咗糾正個會過去畀人嘅不良印象，佢四出頻頻活動，尋日出席一個社企活動時，原本想問吓佢過年去咗邊度玩，點知林煥光即刻呻話新年日日都要開工，冇得出去玩，但佢都自爆上任前先去咗澳洲三個禮拜。
承認平機會跌得好傷
佢話，由上任到依家，一直冇停過咁滯，工作忙不特止，仲要同社會各界互相認識，建立關係，淨係去social都佔去好多時間。佢承認，舊年審計署炮轟平機會一役，令平機會跌得好傷，希望可以盡快重建市民對平機會嘅信心咁話。
家人有冇詐佢型㗎？林煥光笑笑口話冇，仲自爆上任前去咗澳洲玩三個禮拜，喺最後一個禮拜先收到政府個長途電話，話委任佢做平機會主席。